Supergirl 38 million dollar bilan boşladi: prognoz 47–50 edi
DC Universening ikkinçi filmi «Supergirl» 26-iyun kuni AQŞ kinoteatrlariga çiqdi. Kassadagi start kutilganidan past böldi.
Dastlabki hisob-kitoblarga köra, uç kunlik oçiliş AQŞ va Kanadada taxminan 38 million dollar, dunyo böyiça taxminan 68 million dollar bölgan. Filmning işlab çiqariş byudjeti 170–186 million dollar, bu global reklama xarajatlarisiz. Oldindan 47–50 million dollar başorat qilingan edi. Hafta oxirida «Toy Story 5» yetakçi böldi: ikkinçi haftasida AQŞda 70 million dollar yiğdi.
Soliştirsak, «Supergirl»ning starti Marvelning eng past körsatkiçi «The Marvels»dan (46,1 million) past. «Joker: Folie a Deux»ning 37,6 millioniga esa juda yaqin. Tomoşabin bahosi ham örtaçaröq: CinemaScore — B-. «The Flash» va «Aquaman and the Lost Kingdom»da B edi. PostTrak sörovida tomoşabinlarning 52 foizi filmni albatta tavsiya qilişini aytgan. Qiziq tomoni: zaldagi tomoşabinlarning 59 foizi erkak, 41 foizi ayol bölgan. Lekin tavsiya beriş ayollarda yuqoriroq: 62 foiz, erkaklarda 45 foiz.
Bitta yaxşi raqam ham bor. Film tuşumining 51 foizi Imax va boşqa premium formatlardan kelgan. Imaxning özi aytişiçha, bu superqahramon filmlari orasida Imaxdagi eng yuqori oçiliş körsatkiçi. «Supergirl» Imax uçun suratga olingan. Imaxdagi global tuşum 10,9 million dollar.
Kontekst şunday. Yilning boşida DC Universeni boşlab bergan «Superman» 125 million dollar bilan oçilgan va 618 million dollar bilan yakunlagan. Uning byudjeti 225 million edi. «Supergirl» esa Clarkning amakivaççasi Kara Zor-El haqida. U oddiy tomoşabinga Supermançalik taniş emas. Boş rolda Milly Alcock. Kara galaktika böylab itiga zarar yetkazgan odamni qidiradi, yölda yoş qiz Ruthye va Jason Momoa öynagan Lobo uçraydi. Film Tom King va Bilquis Evelyning «Supergirl: Woman of Tomorrow» komiksiga asoslangan. Rejissyor — Craig Gillespie, ssenariy muallifi — Ana Nogueira.
Bu butun bozorning muammosi emas. Yil boşidan 28-iyungaça AQŞ kassasi 4,7 milliard dollarga yetdi. Bu ötgan yilning şu davridan 15 foiz köp. Yoz mavsumi 2,1 milliarddan oşgan. Yani problema aniq bir filmda.
Keyin nima böladi? Baʼzi tahlilçilar filmning zarari 100 million dollarga yetişi mumkin deb taxmin qilmoqda. Bu rasmiy raqam emas, faqat taxmin. DC Studios rahbarlaridan Peter Safran «Supergirl»dan keyin heç narsa özgarmaganini aytgan. Rejalarda Andy Muschietti rejissyorligidagi «Batman: The Brave and the Bold» va «Clayface» bor. Ularga endi köproq eʼtibor qaratilişi mumkin. 4-iyul hafta oxirida esa kassada «Minions & Monsters» kutilmoqda.
▶
Qaysi premyerani köproq kutyapsiz?
Manbalar: Vikipediya, Variety, Deadline, The Guardian, /Film
